Alte Feckel

Känne mier dohier frueh sei, ass des verfluchte Virus wenig Zeit bis itze drwischt hot! Hoffentlich blabbt des aah watter sue. Die zwee erschtn Sätz hot de Meta geschriebn, eh se gewesst hot, ass mr doch net esue verschont gebliebn sei. Im sue wichtiger is des, wos se heit ze iehrn Thema gemacht hot: Mier alle känne viel drfür toa, wenn mr alles machn, wos nietig is. Und do muss de Meta ewos lues werdn. Eigentlich is des Ehrensach und de Kinner larne des fr klaaauf, ass mr siech nooch ne Abortgieh de Händ urndlich wäscht. Vuer alln itze, wue de Higenie e ganz grueße Roll spielt, muss mr drauf achtn. Ober naa, de Meta hot dinn Kaufland drlebbt, ass drei Weibsn, die se goar net ze seh kriegt hot, hinterenanner ausn Abort naus sei, ohne siech iehre Dreckpfutn ze waschn. Mr koa siech ja denkn, ass die net när ne Griff vor iehre Eikaufwogn ogefasst habn. Zemindest greifn se noa iehre Maskn. Die sei noochert aah nimmer viel wert als Schutz ober getauscht wern se gewieß net drnooch. Manniche Leit müssn ja möglichst s Zeich oadalfern, eh ses kaafn - oder wieder hielegn. Mr mog siech goar net ausmoln, wos do übertrogn wird be dreckige Händ... (rmö)

00 Kommentare

Die Diskussion wurde geschlossen.