Aschkungbackn

Jeder hot emol klaa oagefange, haaßts. Und "Aus Fehlern wird mr klug" aah. Des wass vuer alln jede gunge Fraa, die iehrn erschtn Haushalt aufbaue und eirichtn muss. Händ, wos koa mr do alles falsch machn! Genau genumme müsst mr do erscht emol miet altn Geschirr oafange und speeter, wenn nischt mehr sue schnell flötn gieht, s gute Zeich, des mr zer Hochzig kriegt hot, auftrogn. Ober aah s Kochn und Backn is sue e Sach, wue mr eigieh koa wie e Priml. Do koa mr ze viel Salz nemme, s Essn oabrenne lossn, ze viel kochn, ass e poar Tog drvoa gessn werdn muss... S gibbt viel, wue e gunge Hausfraa droa verzweifeln kännt. Ober wie de Else iehrn erschtn Aschkung gebackn hot, die Schtorri drzehlt se gern und hot jeds Mol de Lacher auf iehrer Seit: Se schibbt also de Form mietn Taag nei de Backrähr und tut owartn. Wie se emol nespannt, fällt se ball in Ohnmacht. Dr Taag is drbei, übern Rand rauszequelln. Dinne iehrer Nuet greift se nooch dr Streichholzschachtl und steckt e ganze Noat von die Hölzle wie en Zau rundimmedimm nei de Form. Noochert schibbt se alles wieder nei de Rähr. Kännt r eich vierstelln, wos noochert luesgange is dinn den Uefn? Wie de Else des iehrer Schwiegermutter drzehlt hot, hot die geglabbt, se sell veroarscht werdn. Ober s hot scho gestimmt. Blueß nuch emol hot de Else sue e Experement nimmer gemacht. (rmö)

Bewertung des Artikels: Noch keine Bewertungen abgegeben
0Kommentare

Die Diskussion wurde geschlossen.



    Bitte schalten Sie ihren AdBlocker aus. An alle Adblocker

    Bitte schalten Sie ihren AdBlocker aus.
    Mehr erfahren Sie hier...