Din Theater

Mier dohier habns gut. Ruckzuck sei mr duebn Bad Elster und känne uns en schänn Tog machn. Und nuch schänner is, ass mr nein König-Albert-Theater gieh känne, wenn ewos gebuetn wird, wos uns interessiert. Des freit aah de Meta, vuer alln seit se e ganz gute Idee hatt: Sie gieht nein Theater und iehr Schabberich Hans, e alte Wasserratt, gieht drwalle nein Bod, wenn ne de Veroastalting net interessiert. Sue is alln Beedn geholfn. Neilich woar e Konzert miet dr Meta iehrn Lieblingssänger Stefan Gwildis aus Hamburg. Sie und iehr Freindin Gisela soßn drwartingsvoll auf iehre Plätz dinn Rang auf dr zweetn Reihe. De Meta hot do duebn lang viel drlebbt: Liebespaare, die siech geknutscht und egoal annersch gesetzt habn. Und des alles genau vuer dr Meta iehrn Platz. S gob aah Umd, do hot se vorn Hauptakteur goar nischt ze seh kriegt, wall zammgesteckte Köpf vuer iehr woarn. Ober zen Konzert miet n Stefan Gwildis hots ne Fass ne Buedn nausgehaue. Do soß e langhaarige Fraa vuer dr Meta, die kann Moment ruhig sitzn bleibn kunnt. Noochert musst se iehrn Moa wos nein Ohr sogn und ne odrückn. Wie so ober oagefange hot, des Konzert aufzezaagne, hot de Meta när nuch en Arm und kaa Bühne meh geseh. Nooch dr Pause soß se vuer dr Gisela. Nu do erscht! Itze hot dr Meta des Licht vr dr Kamera nei de Aagn geblend. Net lang, und hinter unnern Zween is laut wuern. De Leit habn siech beschwert, ober die Dame hot wattergefilmt. Durch den Spuk hot dr Stefan Gwildis Licht dinn Soal machn lossn und hot gefreegt, wos lues is do duebn. E Gast hot laut geschimpft. Die Fraa ober hot när gelächelt und iehrn Moa imarmt. Bis zeletzt hot se alln zen Schur laufend iehre lange Hoar miet de Händ huechgehuebn. Schod drim, ass mr sette Leit net aafach naushaue koa. Ober s gibbt aah Künstler, die siech die Filmerei gleich verbietn. (rmö)

Bewertung des Artikels: Noch keine Bewertungen abgegeben
0Kommentare

Die Diskussion wurde geschlossen.



    Bitte schalten Sie ihren AdBlocker aus. An alle Adblocker

    Bitte schalten Sie ihren AdBlocker aus.
    Mehr erfahren Sie hier...