Drinnerunge

Im ne zweetn Advent rimm is e Sonderheft vorn "Historikus Vogtland" drschiene miet den Titl "Das leere Wort Freunde". S gieht im de Plauener Sowjet-Garnison - im Erfahrunge, Erinnerunge, Hinterlassenschaft. De Meta hatt siech aah sue e Broschüre gekaaft. Se hot zwoar nischt miet der Sach ze toa gehattn, ober wie de Russn be uns dinn Kreis Auerboch eigezuegn sei, hot se hautnah mietdrlebbt.

Sellmol hot se gegnüber der itzign Trützschler-Schul in Falkenstaa gewoahnt, wue de Soldatn miet iehre "Pannje-Wogn" miet die klann Pfer Halt gemacht habn. S Erschte, wos die Soldatn gemacht habn, woar Wasser huln fr iehre Pferle. Zer Meta koam e ganz gunger. Ihr Mam hot den Aamer nauf de Guss gestellt und s Wasser aufgedreht. Der klaane Kerl is vuer Schrack auf de Knie gefalln. De Kinner habn gelacht, und de Angst vuer den fremme Soldatn woar weg. Zwee Tog speeter sei de Kinner miet Essgeschirr nüber naufn Schulhuef, habn Supp und Bruet kriegt. Und des von Menschn, dene de Deitschn en Krieg aufgezwunge habn! Jede Familie gegnüber dr Schul hot als Eiquartiering en Offizier kriegt. Dr Meta iehrer woar dr bildschiene 28-gährige Aleksander, den des klaane Maadl geliebt hot, aah wenn r egoal ne Abort versaut hot. Dr Offizier e Trepp höher is ze r Familienfestlichkeit e sue besoffn gewesn, ass r ogehult wuern is. Der hot Prügel kriegt und is nimmer wiederkumme. De Deitschn hattn ne ober net verpfiffn. An en 8. März wottn de Hortnerinne dinn dr Meta iehrn Hort emol e poar sette Offiziersdamen aus Plaue eilodn. Net emol e Antwort gobs. Und ze en Tierparkfest hot de Meta Tee ausgeschenkt an die russischn Kinner, die aus Grünhaad koame. Kaa Kind und kaa Drziehere hot Danke gesoocht.

De Meta hot miet oaseh müssn, wie e ganz gunger Soldat duntn Zwicke droan "Ring-Café" e Fraa tuetgefoahrn hot. De Meta möcht siech sei Strof net vierstelln... (rmö)

0Kommentare

Die Diskussion wurde geschlossen.



    Bitte schalten Sie ihren AdBlocker aus. An alle Adblocker

    Bitte schalten Sie ihren AdBlocker aus.
    Mehr erfahren Sie hier...