Lang is her

Schon gehört?
Sie können sich Ihre Nachrichten jetzt auch vorlesen lassen. Klicken Sie dazu einfach auf das Play-Symbol in einem beliebigen Artikel oder fügen Sie den Beitrag über das Plus-Symbol Ihrer persönlichen Wiedergabeliste hinzu und hören Sie ihn später an.
Artikel anhören:

50 Goahr is her, ass dr Bau vor dr Falknstaaner Tolsperr oagefange hot. Naa, wie de Zeit vergieht! Die Kinner, über die de Meta heit schrabbt, woarn sellmol grueße Schüler. Itze sei se scho längst Grueßeltern. E mannicher vor iehne koa siech velleicht kaum nuch droa drinnern, wie r dort hintn dinn Göltzschtol Staa geschleppt hot. Summer is gewesn, und ganz hintn wue s Kinnerbod hie sollt, woar e Trupp aus dr ehemolign Georgi-Dimitroff-Oberschul nebn dr Falknstaaner Kirch dinn Eisatz ze de grueßn Ferien. De Meta is als Drwachsne drbei gewesn. Als Noame falln r när nuch Vroni und dr Peter ei. Aber ass se alle tüchtig woarn, des stieht fest. Vor Früh bis zen Noochmitig habn se allezamm Staa geschleppt dinn dr Sunn. Des is ganz schie auf de Knochn gange, ober s hot Spoaß gemacht. Se habn ja gewesst, ass s fr e gute Sach is. Wenn Pause woar, logn se dinn Wald und habn Kofferradio gehärt. Kann Mucks habn se gemacht, jeds hing san Gedankn nooch. När aa Problem gobs. S Wasser. Wenn jemand naufn Abort musst woar dr Weg weit. Mr musst nauf de "Göltzschtolmühl". Dort duebn is e Finnhütt gestandn miet Abort ohne Wasserspüling. E ekelhafte Oagelegnheit! Wie de Meta s erschte Mol siech de Händ waschn wollt, is r oagebuetn wuern, siech über de drecketn Teller dinn Aufwaschbeckn ze raanefiern. Des hot se ogelehnt. Vor do oa is e Schüssl miet Wasser nei de Finnhütt kumme. Die Sach mietn Wasser hot zeletzt drzu gefiehrt, ass die schiene Ausflugsgaststätte zugemacht wuern is. E Wasserleiting wär ze teier kumme. Velleicht tut jemand aus dere Eisatz-Truppe die klaane Geschicht lesn. De Meta will dodrmiet sogn: Des woar e schiene Zeit miet eich! (rmö)

00 Kommentare

Die Diskussion wurde geschlossen.