Spielschleim

Nu pfui Teifl nuch emol! Wos wird denn unnern Kinnern nuch alles zen Spieln oagebuetn werdn? Auf welche Eifäll wird de Spielzeigindustrie nuch kumme, im Geld ze machn? Wie de Meta dinn Blatt gelesn hot, ass s "Spielschleim" gibbt, den de Kinner aah nuch klasse finne, hot se siech geekelt wie seltn. Als Ertschts hot se Spucknäpf vuer siech geseh, die früher emol rimmgestandn sei wegn Auswurf und sue. Noochert hot se die schlimme Prozedur vuer siech geseh, wenn Schwerkrankn dr Schleim ogezuegn wird, ass se net drstickn droa. Aah wenn de Meta arg tierliebend is, ober e schleimiche Schneck oafassn ohne e Blatt drimrim, des gieht net. Und sue kännt se nuch mannichs aufzehln, zen Beispiel, wie e "Schleimer" auf annere Menschn wirkt.

Naa, und unnere Kinner liebn des Zeig, des mier Grueßn möglichst net oagreifn. Wenns ober emol gepassiert, waschn mr uns ganz schnell de Händ. Wenn der Spielschleim wingstn ugefährlich wär! Ober esue is Borsäure in Mengen dinne, die sinstwos auslösn koa bis hie zer Ufruchtbarkeit. Mr därf siech goar net neidenkn. Und setts Zeig gibbts zegoar nuch be "Vikilulu Crystal Slim" dinne Getränkedosn miet Struehhalm. Be den Wort Crystal kännt de Meta lang s nächste riesngrueße Problem hernemme... (rmö)

Bewertung des Artikels: Noch keine Bewertungen abgegeben
0Kommentare
Um zu kommentieren, müssen Sie angemeldet und Inhaber eines Abonnements sein.



    Bitte schalten Sie ihren AdBlocker aus. An alle Adblocker

    Bitte schalten Sie ihren AdBlocker aus.
    Mehr erfahren Sie hier...