Verrückter Zufall

Leit, iehr werds net glaabn, ober des hot siech wirklich genau esue zugetrogn: Iech haaß ja när dinne unnern Blatt Meta. S hot siech halt sue drgebn. Jednfalls hot mei Schabberich Hans emol rimmgegugelt, obs in Deitschland nuch e Renate Mönnich gibbt. Und weiß dr Bock! R hot nuch dreie gefunne, die aah esue haaßn wie iech und aah ball mei Alter habn. Iech ho mr de Adressn und de Telefonnummern aufgeschriebn, wall iech se be Gelegnheit mol oarufn wollt. Oafang Juli bie iech wie jeds Goahr nüber auf Franzensbad zer Kur gemacht. Ne drittn Tog soß iech grod miet Paraffin droa de Händ eigepackt dort und ho r Fraa noochgeguckt, die mr wegn iehre schänn Hoar aufgefalln is. Do sogt mei klaane Therapeutin: "Die Frau heißt genau wie du!" Iech ho de Aagn aufgerissn vuer Überrasching. Noochert ho iech den annern, die nuch miet dortsoßn, die Sach miet dere Gugelei drzehlt. Die woarn natürlich aah von de Sockn. Ne annern Tog triff iech die Fraa bin Frühstück. Iech ho ne Arm im se gelegt und gesogt: "Na, du - und ich. Ich heiße auch Renate Mönnich." Iehr kännt eich denkn, wie die geguckt hot. Umst soß se lang droa unnern Tisch und hot siech arg gefraat. Unnere Geburtstog liegn när e poar Tog ausenanner, fast dieselbn Kranketn habn mr. Also passt alles zamm. Nu sogt blueß, des is kaa verrückter Zufall, ass e Berlinere und e Vuegtländere miet denselbn Noame siech drübn in dr Tschechei dinne an Haus übern Weg laafn. (rmö)

Bewertung des Artikels: Noch keine Bewertungen abgegeben
0Kommentare

Die Diskussion wurde geschlossen.



    Bitte schalten Sie ihren AdBlocker aus. An alle Adblocker

    Bitte schalten Sie ihren AdBlocker aus.
    Mehr erfahren Sie hier...